Mkoa wa Geita ulichaguliwa kwa ajili ya Maadhimisho ya Kilele cha Mbio Maalum za Mwenge wa Uhuru 2021, ambayo yatafanyika katika Uwanja wa Magufuli – Halmashauri ya Wilaya ya Chato, Geita tarehe 14 Oktoba, 2021. Maadhimisho haya yanamuenzi aliyekuwa Rais wa Tanzania, hayati Dk. John Pombe Magufuli na pia yanakwenda sambamba na kumbukizi la taifa la Tanzania la kifo cha baba wa taifa Mwalimu Julius Kambarage Nyerere.
Aidha, kutakuwa na maadhimisho ya wiki ya vijana kuanzia tarehe 08/10/2021 ambayo hutoa fursa kwa vijana wa Tanzania nzima kuja kuonyesha kazi zao za shughuli za ujasiriamali wanazofanya.
Uongozi wa Mkoa wa Geita, chini ya Mkuu wa Mkoa, Mhe. Rosemary Senyamule unawaalika wadau wote kuja kushiriki katika kilele hicho ikiwa ni pamoja na kushirikiana na mkoa wakati wa maandalizi ya tukio hili muhimu katika taifa letu.
