Posted on: February 26th, 2018
Rais wa Jamhuri ya Muungano wa Tanzania Mhe. Dkt. John Pombe Magufuli leo ameshiriki ibada katika Kigango cha Mlimani (Parokia teule ya Mlimani) Chato ambapo amewapongeza waumini wa kigango cha Mlimani kwa ujenzi wa Kanisa jipya.
Katika ibada hiyo iliyoongozwa na Paroko msaidizi wa Parokia ya Chato Padri Alex Brandi Rais Magufuli amewapongeza waumimi wa Parokia Teule ya Mlimani kwa jitihada za ujenzi wa Kanisa jipya ambalo limejengewa kwa nguvu zao.
“Hongereni sana kwa ujenzi huu sikutegemea kama nitakuta kanisa limekamilika kwa hatua hii bila hata wafadhili wa nje… Mumewadhihirishia watanzania kuwa mnaweza…” alisema Rais Dkt Magufuli.
Rais Magufuli pia amewaomba waumini wa Mlimani kuendeleakumwombea kwa Mungu ili atimize wajibu wake vizuri. Rais Magufuli amechangia shilingi Milioni mbili kwa ajili ya ukamilishaji wa kanisa hilo
Naye waziri wa Nishati Mhe. Dkt. Medard Kalemani ambaye pia ni mbunge wa jimbo la Chato amemshukuru Mhe. Rais Magufuli kwa mchango huo na amewaomba waumini wote kuendelea kumwombea kwa Mungu ili atimize majukumu yake vizuri ambapo pia amechangia ujenzi wa kanisa hilo kiasi cha shilingi milioni moja.
Akimkaribisha kanisani hapo Paroko msaidizi wa Parokia ya Chato Padri Brandi amewaomba waumini kuwaombea viongozi wa dini na serikali hasa Rais Magufuli ili Mungu azidi kuwalinda katika utendaji wao wa kazi na katika kuwatumikia watanzania
Rais Dkt Magufuli yupo Chato kwa ajili ya mapumziko mafupi.
