Posted on: March 9th, 2018
Rais wa Jamhuri ya Muungano wa Tanzania Dkt. John Pombe Magufuli amefungua tawi jipya la Benki ya CRBD lililopo wilayani hapa.
Mheshimiwa Rais Magufuli ameipongeza Benki ya CRDB kwa kuendelea kutoa huduma nzuri na ameziomba benki kupunguza riba katika mikopo wanayotoa ili wananchi wengi waweze kunufaika.
Aidha, Mhe. Magufuli amewataka wananchi wa Wilaya ya Chato na Geita kwa ujumla kuitumia benki ya CRDB kwa kuwa inaaminika na huduma zake ni nzuri na itaimarisha usalama wa fedha zao kwa maendeleo ya taifa.
Benki ya CRDB imemkabidhi pia Mhe. Rais Magufuli Hundi ya shilingi milioni 50 kwa ajili ya ujenzi wa uwanja wa mpira wa miguu wa kisasa utakaoanza kujengwa hivi karibuni.
Waziri wa nishati Dkt. Medard Kalemani ambaye pia ni mbunge wa ji,npo la Chato ameishukuru benki ya CRDB kwa kuendelea kuwekeza Chato ambapo amesema ni kutokana uhusiano mzuri ulioanzishwa Mhe. Magufuli na benki hiyo wakati akiwa mbunge wa jimbo la Chato.
Mhe. Dkt. Kalemani pia amemwomba Mkurugenzi Mkuu wa CRDB jengo ambalo benki hiyo watahama ili Halmashauri ilitumie kwa ajili uanzishwaji wa kituo cha Teknolojia ya Habari na Mawasiliano.
Naibu Waziri wa Fedha na Mipango Dkt. Ashatu Kijaji amesema kuwa kwa Tanzania inaongoza kwa huduma za Kibenki Afrika ambapo inashika nafasi ya sita duniani.
Kufunguliwa kwa Tawi la Benki ya CRDB Wilayani Chato kutatoa fursa ya wananchi kupata huduma za kibenki karibu na maeneo yao kwa kutunza fedha na kukopa mitaji kwa ajili ya maendeleo.
